एक प्रेम कहानी || ek prem kahani

कठैं मैयाके ढागा सबसे बलगर रहट् । जोन मायामे सारा संसार बाँचल बा । माया जिन्गि हो कठैं माया सब ठोक हो कठैं । माया बिना बच्ना इसंसारमे  मुस्किल बा । कठैं मैयाँ असिन चिज हो शरीर छुटजाइट तर मैयाँ कबुनै छुटट् । जत्रे डुर हुइबो ओत्रे मैयाँ लटपटाइट् । उहे मैयाँ जिन्गिम बार बार झस्काइट, रुवाइट ओ टरपाइट् । अस्ते जिन्गिक कहानि बटिन सन्तोसके ओ रन्जिताके । 

कहानि यहाँसे सुरु हुइठिन ।

सन्तोस ओ रन्जिता एक्के गाउँमे जल्म हुइठिन डुनुजे छुटिहिं संगे खेल्ठैं रठैं ओ पह्रे फेन संगे जैठैं । हँस्टि खेल्टि डुनुजे जवान हुठैं ओ डुनुजे एक डोसर हे चाहे लग्ठैं । इहे बाट मे ओइन पर मनै सक करे लग्ठैं ओ रन्जिटक घरक मनै पटा पाके रंजिता हे सन्तोस से छुटैना सल्हा करठैं ओ  छुटाके अन्टे लगाडेठिन । बिछोडके कारन सन्तोस पागल हस होजैठैं कुछ समज नै अइठिन का करु का नै करु कहिके । खैना सुत्ना कुछ होसे नै रहजैठिन । 

कुछ दिन पाछे रन्जिताके भोज हुठिन ओ भोजेम सन्तोस फेन जैठैं । इ भोज डुनु जहनके मिलन करैना ओ मुह हेर्ना बहाना बन्ठिन । बिछोडके कारण डुनुजहनके मन टुटल रठिन डुनुजे एक डोसरके माठेम टीका लगैलै मन भिट्टर से रोके एक डोसरके माया मे टरपठैं । डुनु जहनके लाग उ पल सहेनै सेक्न रठिन टर मनहे ठामके रहजैठैं । भोज होजैठिन रन्जिताके तर संन्तोस अकेलि होजैठैं । संगे हँस्लक खैलक पह्रे गैलक सबकु छ मनेम रहजिठिन । जहाँगैलेसे फेन रन्जिताके याद पलिरठिन बिस्रैना करठैं तर आउर याद सटैठिन । बर्सो से संगे रहल जिउ बिछोड पाछे बहुट रुओइठिन डुनुजहन तर एक हुइ नै पैठैं । 

संन्तोस मन बहलाइक लाग भारत जैठैं कुछ बरस पाछे तर ओहाँ फेन सान्ति नै पैठैं । गाउँ आके फेन से रन्जिताके भेंट हुइठिन कहेकि रंन्जिताके भोज गौहिमे हुइल रठिन । डुनुजे पुरान घट्ना छोरके आघक जिन्गि हेर्ना बाट कर्ठै । एक डोसरके हुइनै सेक्ना अपन किस्मत के उप्पर डोस लगैठैं । तर सन्तोस अपन गरिबी हे डोस लगैठैं । 

सन्तोस अपन प्यारहे छिन्लक कारण असन्तुस्तिके जीवन जिएलग्ठैं । एकठो अंछोर्नाके करण रहिन रन्जिता पेटेम रहल बेला डाइ डोसर पर डेसेकल रहिन । पहिलक चलन मे पेटेम मिट मिलैना किटे भोज करैना एकठो बाचा करजाए ओहे बाचा मे बाझल रहिन रन्जिता ओ सन्तोसके जिन्गि । पर डुनुजे असिन बाचासे असन्तुस्त रहिंट् । डुनुजे अपन जिनगिक खेल्वार करल कहिके एक डोसरके मायामे टरपके टरपके जिटिरठैं । 

https://youtu.be/0dpM4RuFfG4?si=VsmCADvyJButidea

पूरा गितिकथा सुनकलाग YouTube च्यानलमे जाइ सेक्बि । च्यानल हो Fulariya Music Video / @fulariyamusic मे ।  सजिलो के लाग लिंक मे जाइसेक्बि । धन्यवाद!