थारु भोजहा मागर गित ।
भोजक पहिला रात डिउलि डर्ना ठनसे सुरु हुइट् । डिउलि डर्ना कलक् कचरिक बरिया पकैना उरडक् डाल बनैना हो । इ डरकलाग काकाचिज के जरुरट परट् सक्कु चिजके बयान करल पाजाइट् । डउलि डरकलाग भिजिन्या से लेके भनसरि पहुनि पाट सक्कु जहनके भिरभार रहट् । उहे बेला डिउलि डरना मागर गाजाइट् ओहे गित मिठास रहानके धनि सन्ति चौधरी अपन जवान पनके बैराग लग्तिक मनछुना मेरिक धेर विसय मे मागर गाइल सुने मिलट् ।
सन्ति अपन मागर भोजहा पट्या टुर्ना ठनसे सुरु कर्लेटिन । साखु पाटा लुरुलुरु शब्दसे सुरुहुइल रहान जाट्टिके मन पिघ्ला डेहट् सुन्ति सुहाउन रहानमे डिउलि डरबेर गैना मागर फेन सुने मिलट् जहाँ चकिया से लके सक्कुचिज कहाँ कहाँ सिर्ल कना बाटमे मागर सुनेमिलट् ओस्टके चिकियक खुँटि पकरक् लाग भनसरिन गोर्चलक् गित सुने मिलट् ।
असहेक् डुल्हा संपराइ बेर छावा ओ डाइक् बिचमे संपर्ना लुगरा जस्तके अंगिया, पैजामा, टोपी, जुत्ता के डुल्हा सुघ्घुर लुग्राके लाग अपन डाइ हे संटैलक् गितमे सुने मिलट । हाँथि घोरामे सजल बराटके बयान कलर चिम्टनके पहाँट हस नम्मि लागल कटकुइया फुलाहस बराट सजल के बयान करल गित सुने मिलट् ।
बराट प्रस्थान के बेला डग्गर घाटमे आइ परल डुख हैरान के बयान ओ सम्ढि सम्ढा बिच हुइल बाट सुने मिलट् । डग्गर भर डुल्हा छेग्रि, गइया, भेैंस, घोरि चह्रुइयासे डुल्हिक घर पुंछ्टि जगैलक गित सुने मिलट् । हाँथि घोरिमे डुल्हा डुल्हिक घर पुगट् ओ डेउठान पुंछटि डुल्हिक अंगना पुगट् । डुल्हा बर्छि गर्लक ससरारिक डेउटन छाँकि ढंरकैलक ओ लडिया पहुँरके इलक घालक अंगिया पगरी जुटा भिजाके अाके डुल्हा घरे अइलक बाट डुल्हा अपन डाइहे सुनैलक मन छुना गित सुने मिलट् ।
अस्टके छाइ बाबासे अपन सिंगर नै लेडलक् कारन बाबक् देश छोरके डुर चलजिना मनक बह सुनैलक् गित फेन सुने मिलट् इ गितमे ।
थारूनके भोजहा गित लोप हुइना जोखिम मे बा जोन गितमे मार्कि शब्दसे भरल एकठो भोज भर डुल्हा ओ डुल्हिक घर परयारमे हुइना सबचिजके बारेम मन छुना भावसे भरल गित रहट् गल्गनके गित ।
अब्बा आधुनिक समयमे भोजहे सुहाउन करैना मागर गित सुने नै मिलट् । कनाहो कलेसे इ गित हमार भोजक प्रमार हो । इ गित सुनके जन्ना मनै हरकोइ कहेसेकट् कि भोजहा लग्गन के मागर हो । अब्बा हमन भोजेम बोजैना आधुनिक गित बनाके बोजैना जरुरट नै हो हमार थन पुर्खोसे तयार रहल भोजहा गित माँगर पलिबा ।
https://youtu.be/4kNGMzryiT4?si=Hm7Zrk5WXOiRHMXy
ओनाइक लाग YouTube || Fulariya music video म जाइ सेक्बि ।
0 टिप्पणियाँ