एक दिन के बाट हो । जब मै आपन गाउँसे बराट डोसर गाउँ मे गाइनु । उ गाउँ मोर पहिल बार रहे उहाक कोनो मनैन नै जानू । सब जे आपन आपन मनैन सङ भुलाइ गैनै, मै टे अक्क न पक्क कवाइल एकठो ढुङ्गा मे बैठके मोबाइल चलाके बैठल रहु । अचानक एक आवाज आइल बरतियन सब खाना खाइ आउ । टब मै फे गाइनु खाना खइना टेबुल मे बैठनु अनि कोइ पानी देहटहिट कोइ गिलास कोइ भाट त कोइ सिकार,दाल ,टिना, अचार , सब जे आपन आपन कामेम रहिट । मै खाना खा के हाट ढोइ नल्का मे गैनु अनि अत्ना सुघार लवन्दी नल्का चलाइटही मोर नजर टे उहिन देखटिकिल पहिल नजर प्यार कर्बैठल । मै ढुइती कनु हाइ हजुर के नाउ का परल न ? टब उ मुस्कुरैटि बिन बोल्ले नल्का छोरके भाग्गैली ओ हेल्लो आपन नाउ टे बाताउ । उ बिना जवाफ के गैगिलि तब मै फे उहाँ से भोजहा घरे वहोर गैनु ।
अगंना मे दि जे D.J साउन्द बोल्टहे मोर संघारिन बलाके कनै अरे विशाल एक गाना मे डान्स ते देखाउ यार । तब मै कनु मै अकेली नै नाचम एक जे टे आउ मोर सङ, टब सघरियन कनै सुरु टे करो अब्बा पठाब । यहोर से मै डान्स सुरु करे लग्नु तब उहोर से फे पठैनै । उ टे नल्का वालि रहिन । दुनु जे खोब डान्स कर्ली उ फे कम नै मै फे कम नै खुब हरबड्डा हुइल । हुकार नाउँ पुछनु टे नै बतैलै जब हुतिङ्ग हुइल । तब हुकार नाउँ जन्नु डान्स कर्के सेक्के फेन उहिन कनु देख्लो तु नाउँ नै बटैलो लेकिन सक्कु जे बटादेनै ना । टब उ मुस्कुरैटि कनै जन्लो आब टे ? मै कनु हुम जन्नु ।
हामर बाट कर्ना डग्गर मिल्गैल अो हामर गाउँ फे आइहो ना कनु । उ कलि ठिक बा डाइ बाबा से पुछम टे कहम । मै कनु जैसिक फे आइ परि । ओत्रै कति उ उहाँ से गै गैली ...अब पाला आइल संघरियन के संघरियन सब महि जिस्काइ लग्नै वाउ विशाल टु टे बरा फास्ट निकर्लो यार बरा जल्दी बथानिया पटा डर्लो । आब हमार सङ कहाँ रबो ना विशाल ? मै कनु अइसिन बाट नै हो यार उ फे टे मन पराइ परल न ओत्रै कटि पाछे से आवाज आइल विशाल यहाँ आउ टे । मै खुसी से पागल हो गैनु मै हटार हटार हुकार ठन गैनु । मै कनु का कलो उ कनै मोर टे उ गाउँ मे कोइ फे नै हो जे । मै कनु संघरिया बना के कथो, कि कोइ नाइ हो । मै बटुँ जे कहि के हुकार हौसला बह्रैनु और मोर गाउँ अइना तयार हुइनै । अत्रैम मै कनु आपन नम्बर डेउ न उ आपन नम्बर डेनै मै मिस्कल कर्नु मै कनु इ मोर नम्बर हो फोन कर्हो ना । टब कनै ठिक बा साझ पर्गिल रहे आब हाम्रे आइना टयारी करेलग्लि । डैजाहा सामान टेक्टर मे लोड कर्ली और उहासे बिदाई लैके आइ गिलि ।
हाम्रे आघे आघे ओ डुल्हनियक् टेक्टर पाछे पाछे हम्रे । करिब 10:30 बजे घर पुगली मोर डिलो डिमाग हुकहिन किल खोजे । मै फोन कर्नु कहाँ बटो ? उ कनै मै घरे बटु । महिन टे कैसिन कैसिन लगल मै कनु काजे नै आइलो आइम कहिके मनैन ठग्ना, उ कलि मजाक कर्टु टुहाँर पाछे टे बटु । मै टुहिन डेखतु । मै कनु आउ न टे मोरठन मै टुहिन नैडेख्ठु । उ कनै आइटु हो । कुछ डेर मे आइलै । उ ओ मै भोजहा घर से ठोरचे डुर जाके मस्ट गफ गाफ कर्ली । उ राट बिट्लक पत्तै नै चलल् । डोसर बिहन के पठ्लाह्रिन के बिडाइ हुइटहे । उ महिन आँसेले रसाइल मलिल अँखीसे हेर्टि बाइ बाइ विशाल हाँठ हातके इसारा कर्टि फोन मे बाट कर्बी ना कटि बिडा हुइलिन । ओर मै फे एहोर से हाँठ हिलैटि बाइ बाइ कनु ।
असिके उ महिन से डुर डुर हुइली । पाछे हमार फोन मे बाट हुइना करे, कबु मै करु कबु उ करिन । अस्टके साल दुई साल बिट्लक पत्तै नै चलल् । एक रोज उ कलि विशाल महिन भेट करो न । मै कनु कहाँ भेंट करि ? उ कनै धनगढी फनपार्क मे, मै कनु ठिक बा फनपार्क घुम्नास लागल का ? उ कलि हजुर । मै हटार हटार टयारी हुइनु ओ फनपार्क पुग्के फोन लगैनु फोन सुइचप रहे । मै निरास हुइनु सोचे लग्नु कि महिन अत्रा धोखा डेनै । मोबाइल टक सुइचप मै बार बार फोन लगैना प्र्यास कर्नु टर उदिन नै आइली । साँझ फे हुइलागल मै कनु आब नै आइही का । मै उहाँ से घरे आगैनु राट भर फोन कर्नु मोबाइल बन्द के बन्द । एक डिन, डुइ डिन हप्टा बिटल । टब मै सोच्नु नै आब हुकार गाउँ जाइपरल काहुइल बटिन । अपन मोबाईल बिगर्ले से फे औरेक मोबाईल से त फोन आइना हो । का होगैलीन कहिके मै हुकार गाउँ गैनु टे डगरेम हुकार संघरिया हे भेटैनु । हम्रे हाइ हेल्लो कार्ली टब मै पुछनु उ कहाँ गैल बटिन ? फोन फे बन्ड बटिन ओ फोन फे नै कर्ली का हुइल बुटिन बटाउ ना । हुकर अँख तुरुन्ते रसा गैलिन कैसिक कहु विशाल टुँ सुने नै सेक्बो उ टुहिन हड्से ज्यादा माया करिन हमहन जब फे बाट करिट टे टुहार बाट किल करिन औरे बाे नै करिन ।
का कनाहो साइट इहे कारन हुइ हुकार बाबा जबर जस्टि भोज करडेलिन । जौन दिन टुहिन भेंट करब कलिन उदिन मै ओ उ संगे टुहिन भेंटे करे आइकलाग रहि । टयार हो मै हुकार घर गैनु टब हुकार बाबा मोबाईल सिम सब टुर डेलिन । आज से किहुसे बाट करल डेखम टे महिसे जनले बटु टोर काहुइट । कहिके आनब सानाब गारी डेटि कोन्टिम कर्या डेलिन । उ बिचारी खोब रोइलिन उहे राट जबरजस्ती भोज करडेलिन विशाल कलिन । मोर अँखीम से अाँस के लडिया बहे लागल । उ महिन सम्झैटि कलिन, का कर्बो अस्टे हो इ सब आज कालिक डाइ बाबनके का पटा माया कना का चिज हो ? चिन्टा ना करो जाउ आब घरे । समय फे ढेर होगैल हुकार बाबा पटा पैहिन टे पिटे लगैम कहल बा । टब मै कनु मै का गल्टि कर्ले बटु जे मरहिं पिटहिं माया टे कर्ले बतु । उ फे सच्चा माया....फेन उ कलि विशाल माया पैना किल माया नै हो, गुमैना फे माया हो । हुकार मायाके यात्रा तुहार संग अत्रै रहल हुइ । आब चिन्ता ना लेउ घरे जाउ रा फे हुइलागल उहे फेन साइकल मे बाटो । चिन्टा ना करो लेउ मै जाइतु नै टे महिन फे डाइ बाबा गरियही बाइ ।
0 टिप्पणियाँ